കള്ള് ഷാപ്പ് ലേലം ഇനി മുതൽ ഓൺലൈനിൽ

കേരള സർക്കാരിന്റെ എല്ലാ സേവനങ്ങളും ഓൺലൈൻ ആക്കുന്ന നയത്തിന്റെ ഭാഗമായി, മദ്യ ഉൽപ്പാദന, വിതരണ, വില്പന മേഖലയിൽ സുതാര്യത ഉറപ്പുവരുത്തി, ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനാണ് കള്ള് ഷാപ്പുകളുടെ വില്പന ഓൺലൈൻ ആയി നടത്തുവാൻ സർക്കാർ തീരുമാനിച്ചിരിക്കുന്നത്. 2024-2025, 2025-2026 സാമ്പത്തിക വർഷങ്ങളിലേക്കുള്ള കള്ള് ഷാപ്പുകളുടെ വിൽപ്പനയിൽ പങ്കെടുക്കുന്നതിനായുള്ള അപേക്ഷകരുടെ ഒറ്റത്തവണ രജിസ്ട്രേഷൻ ഓൺലൈൻ പോർട്ടൽ വഴി 2024 ആഗസ്റ്റ് 13 വരെ നടത്താവുന്നതാണ്.

ഓൺലൈൻ സർവീസ് പോർട്ടൽ വഴി കള്ള് ഷാപ്പുകൾ വിൽക്കുന്നതിന് ബാധകമായ പ്രത്യേക വ്യവസ്ഥകൾ

1. കള്ള് ഷാപ്പുകളുടെ വിൽപ്പനയിൽ പങ്കെടുക്കുന്നതിന് eToddy ഓൺലൈൻ പോർട്ടൽ വഴി അപേക്ഷ സമർപ്പിക്കുന്നതിനുള്ള തീയതി സർക്കാർ ഗസറ്റിൽ പ്രസിദ്ധീകരിക്കുന്നതാണ്. ഗസറ്റ് വിജ്ഞാപന തീയതി മുതൽ വിൽപ്പന നടപടിക്രമം ആരംഭിച്ചതായി കണക്കാക്കും.
2. റൂൾ 4-ലെ സബ് റൂൾ (1)-ൽ വിജ്ഞാപനം ചെയ്തിട്ടുള്ള ഷാപ്പുകൾ വഴി കള്ള് വിൽക്കാൻ ഉദ്ദേശിക്കുന്ന, നിയമപ്രകാരം യോഗ്യതയുള്ള, ഏതൊരു വ്യക്തിയ്ക്കും ഓൺലൈൻ പ്ലാറ്റ്ഫോമിൽ രജിസ്റ്റർ ചെയ്തു യൂസർ ഐ.ഡിയും, പാസ്സ്‌വേർഡും കരസ്ഥമാക്കി ഷാപ്പ് വില്പനയിൽ പങ്കെടുക്കാവുന്നതാണ്.
3. വിജ്ഞാപനത്തിൽ നിർദ്ദേശിച്ചിട്ടുള്ള രജിസ്ട്രേഷൻ ഫീസ് അപേക്ഷകൻ രജിസ്ട്രേഷൻ സമയത്ത് ഓൺലൈനായി അടയ്ക്കേണ്ടതാണ്. ഇപ്രകാരം അടച്ച രജിസ്ട്രേഷൻ ഫീസ് തിരികെ നൽകുന്നതല്ല.
4. നിയമപ്രകാരം ഏതെങ്കിലും രീതിയിലുള്ള മുൻഗണന ലഭിക്കാൻ അപേക്ഷകന് അർഹതയുണ്ടെങ്കിൽ ആയത് ബന്ധപ്പെട്ട ഫോമിൽ രേഖപ്പെടുത്തേണ്ടതാണ്.
5. ഓൺലൈൻ ഷാപ്പ് വിൽപ്പനയിൽ പങ്കെടുക്കാൻ ആഗ്രഹിക്കുന്ന വ്യക്തി, വിജ്ഞാപനം വന്ന തീയതി മുതൽ ഏഴ് ദിവസത്തിനകം രജിസ്ട്രേഷൻ പ്രക്രിയ പൂർത്തിയാക്കിയിരിക്കണം.
6. ഓൺലൈൻ പ്ലാറ്റ്ഫോമിൽ രജിസ്റ്റർ ചെയ്തിട്ടില്ലെങ്കിൽ, മുഴുവൻ വാടകയ്ക്കോ അല്ലെങ്കിൽ 50% വാടകയ്ക്കോ വിൽപ്പന നടത്തിയാലും, ഒരു വ്യക്തിയെയോ, വ്യക്തികളുടെ ഗ്രൂപ്പിനെയോ ഓൺലൈൻ വിൽപ്പനയിൽ പങ്കെടുക്കാൻ അനുവദിക്കുന്നതല്ല